बैतडी– सुदूरपश्चिम रोयल्सका युवा क्रिकेट खेलाडी हिक्मत महरा एक शैक्षिक परामर्श संस्था ‘आमा एजुकेशन कन्सल्टेन्सी’का सद्भावना दूत नियुक्त भएका छन् ।
छोटो समयमै आफ्नो उत्कृष्ट खेल कौशलका कारण क्रिकेट क्षेत्रमा लोकप्रियता कमाएका महराले उक्त संस्थासँग सद्भावना दूतको रूपमा सहकार्य सुरु गरेका हुन् ।
सामाजिक सञ्जाल फेसबुकमार्फत आफ्नो धारणा सार्वजनिक गर्दै महराले आमा एजुकेशनसँग जोडिन पाउँदा खुशी लागेको बताएका छन् । उनले क्रिकेट मैदानमा आफ्ना सपना पछ्याएझैँ उक्त संस्थाले पनि विद्यार्थीहरूलाई विदेश अध्ययनको सपना पूरा गर्न सहयोग गरिरहेको उल्लेख गरेका छन् ।
“क्रिकेट मैदानमा मैले आफ्नो सपना पछ्याइरहेझैँ, आमा एजुकेशनले विद्यार्थीहरूलाई विदेश अध्ययनका सपना पूरा गर्न सहयोग गरिरहेको छ । यो नयाँ यात्राप्रति उत्साहित छु,” उनले फेसबुकमा लेखेका छन् ।
महराको नियुक्तिसँगै संस्था र खेल क्षेत्रबीच सहकार्य अझ मजबुत हुने अपेक्षा गरिएको छ ।
