बैतडी: बैतडीमा ८७ जना नयाँ क्षयरोगका बिरामी फेला परेका छन्। यस वर्ष ६६ जना पुरुष र २१ जना महिला गरि ८७ जना नयाँ क्षयरोगका बिरामी फेला परेका हुन् ।
गत आर्थिक वर्षमा २०३ जना क्षयरोगका बिरामी फेला परेकोमा यो वर्ष ८७ जनामा क्षयरोग पुष्टि भएको स्वास्थ्य कार्यालय बैतडीका सूचना अधिकारी खगेन्द्रसिंह कार्कीले जानकारी दिनुभयो ।
नयाँ फेला परेको ८७ जनाले नियमीत औषधी सेवन गरिरहेका उहाँले बताउनुभयो । सुचना अधिकारी कार्कीका अनुसार यो अवधीमा ३ पुरुषको क्षयरोगका कारण मृत्यु भएको छ ।
क्षयरोगीको पहिचानका लागि जिल्लामा अभियानलाई तिव्र पारिएको छ । विभिन्न स्थानमा स्वास्थ्य शिविर सञ्चालन गरेर क्षयरोग पहिचान अभियानलाई तीव्र बनाइएको स्वास्थ्य कार्यालयका प्रमुख तीर्थराज भट्टले जानकारी दिनुभयो ।
“क्षयरोगका बिरामी परीक्षणमा नआउँदा चुनौती थपिएको छ ।” कार्यालय प्रमुख भटट्ले भन्नुभयो,“बेलाबेला शिविर सञ्चालन गर्दा पनि परीक्षणका लागि समस्या भएको छ ।”
सुर्नया गाउँपालिका र पुर्चौडी नगरपालिकामा ‘क्षयरोगमुक्त पालिका अभियान’ समेत सञ्चालनमा रहेको उहाँले बताउनुभयो ।
मंगलबार विश्व क्षयरोग दिवसको अवसरमा स्वास्थ्य कार्यालय बैतडीले सञ्चारकर्मी तथा सरोकारवालासँग अन्तरक्रिया कार्यक्रमसमेत आयोजना गरेको थियो। कार्यक्रममा क्षयरोगको समयमै पहिचान र उपचारका लागि जनचेतना अभिवृद्धि गर्नुपर्नेमा जोड दिइएको थियो।
विश्व स्वास्थ्य संगठन का अनुसार नेपालमा प्रत्येक वर्ष करिब ६७ हजार नयाँ क्षयरोगका बिरामी थपिने गरेका छन्।
‘हो ! हामी क्षयरोग अन्त्य गर्छौँः राष्ट्रिय अभियान, हाम्रो योगदान’ भन्ने नारासहित मार्च २४ का दिन विश्व क्षयरोग दिवस मनाइन्छ। यस दिवसले क्षयरोग नियन्त्रणका लागि जनचेतना फैलाउने र रोगको समयमै पहिचान तथा उपचारमा जोड दिन प्रेरित गर्ने उद्देश्य राखेको छ।
नेपालमा प्रमुख जनस्वास्थ्य समस्यामध्ये एक मानिएको क्षयरोग नियन्त्रणका लागि सबै पक्षको सहकार्य आवश्यक रहेको सरोकारवालाहरूले बताएका छन्।
