बैतडी: बैतडीको पाटन नगरपालिकाका तीनओटा विद्यालयमा अध्ययनरत गरीब तथा जेहेन्दार विद्यार्थीहरुलाई शैक्षिक सामग्री वितरण गरिएको छ ।
बालविवाह रोकथाम र किशोरकिशोरीको क्षमता अभिवृद्धिको क्षेत्रमा काम गरिरहेको संस्था परोपकार ग्रामीण विकास संघले विद्यार्थीहरुलाई झोलासहित शैक्षिक सामग्री वितरण गरेको हो ।
कृष्ण मावि पाटनका ६ जना, सिद्धनाथ मावि सिलङ्गाका पाँच जना र सरस्वती आधारभूत विद्यालय पन्त्यौडाका एक जना गरेर १२ जनालाई शैक्षिक सामग्री वितरण गरिएको परोपकार ग्रामीण विकास संघकी कार्यक्रम संयोजक कुन्ती भट्टले बताइन् ।
गरीब तथा जेहेन्दार विद्यार्थीहरुलाई पठनपाठन कार्यमा सहयोग पुगोस भनेर शैक्षिक सामग्री वितरण गरिएको परोपकार ग्रामीण विकास संघका लेखा अधिकृत हेमन्त अवस्थीले बताए ।
सम्बन्धित विद्यालयहरुले गरीब तथा जेहेन्दार विद्यार्थीहरु छनौट गरेको र उनीहरुलाई शैक्षिक सामग्री वितरण गरेको भट्टले बताइन् ।
प्रति विद्यार्थी एक झोला, एक दर्जन कापी, एक दर्जन कलम,एक थान क्यालकुलेटर, एक थान ज्यामिति बक्स, एक छाता लगायतका सामग्री वितरण गरिएको कार्यक्रम संयोजक भट्टले बताइन् ।
