बैतडीको पाटन बजारस्थित बसपार्कको निर्माण एक दशकसम्म पनि सम्पन्न नभएपछि असार १५ अर्थात् राष्ट्रिय धान दिवसको अवसर पारेर स्थानीयले हलगोरु प्रयोग गरी रोपाइँ गरेका छन् ।
२०७१/ ०७२ मा सुरु गरिएको पाटन बसपार्कको निर्माणकार्य हालसम्म अधुरै रहँदा विरोधस्वरुप स्थानीयले प्रतीकात्मक रूपमा धान रोपेर सम्बन्धित निकायको ध्यानाकर्षण गराएका हुन् । पाटन बजार व्यवस्थापन समितिका अध्यक्ष खेमराज भट्टका अनुसार पटक–पटक अनुरोध गर्दा पनि बसपार्कको निर्माण कार्य अगाडि नबढेकाले बाध्य भई शान्तिपूर्ण विरोधको माध्यमबाट दबाब दिन रोपाइँ गरिएको हो ।
स्थानीय व्यापारी कृष्णसिंह भाटका अनुसार सवारीसाधनको चापलाई ध्यानमा राखी सुरु गरिएको बसपार्क निर्माणकार्य सम्पन्न नहुँदा पाटनवासीलाई दैनिक रुपमा समस्या व्यहोर्नुपरेको छ । निर्माण नहुँदा बजार क्षेत्रमै सवारी पार्किङ हुन थालेको छ, जसले थप अव्यवस्था सिर्जना गरेको भाटले बताए ।
पाटन नयाँ सहर आयोजना अन्तर्गत आठवटा बस र चारवटा जीप पार्किङ गर्न सक्ने क्षमताको बसपार्क निर्माण थालिएको थियो । तर निर्माण सुरु भएको एक दशक पुगिसक्दासमेत काम सम्पन्न नहुनु चिन्ताको विषय भएको स्थानीयको भनाइ छ ।
सरकारले मध्यपहाडी लोकमार्ग अन्तर्गतको १० औं नमुना सहरका रूपमा पाटनमा बसपार्क निर्माण कार्य थालेको भए पनि विभिन्न कारणले काम रोकिँदा विकास कार्यमा अवरोध आएको स्थानीयवासीको गुनासो छ ।
स्थानीय नागरिक तथा व्यवसायीहरूले निर्माण कार्य तत्काल अघि बढाई निर्धारित समयमा सम्पन्न गर्न सरोकारवालाको ध्यानाकर्षण गराएका छन् ।
पाटन बसपार्कमा निर्माणमा अहिलेसम्म १ करोड ८० लाख जति खर्च भइसकेको नयाँ शहर आयोजनाका प्रमुख रुद्रनारायण दासले बताए । पछिल्लो समयमा थोर–थोरै बजेट आएका कारणले निर्माण कार्य समयमै सम्पन्न हुन नसकेको उनको भनाइ छ । आयोजनाकातर्फबाट गर्नुपर्ने काम अन्तिम चरणमा रहेको र केही दिनभित्र नगरपालिकालाई हस्तान्तरण गरिने उनले बताए ।
