बैतडीको शिवनाथ ‘पूर्ण संस्थागत सुत्केरी पालिका’ घोषणा

बैतडीः बैतडीको शिवनाथ गाउँपालिकालाई ‘पूर्ण संस्थागत सुत्केरी पालिका’ घोषणा गरिएको छ ।  गाउँपालिकाले पूर्ण संस्थागत सुत्केरी घोषणाको मापदण्ड बनाएको र सोही मापदण्ड अनुसार पालिकालाई पूर्ण संस्थागत सुत्केरी घोषणा गरिएको हो ।

घरमा भएको प्रसुतिको संख्या शून्य भएको, प्रोटोकल अनुसार ४ पटक गर्भ जाँच गरेको, तालिम प्राप्त जनशक्तिबाट स्वास्थ्य संस्थामा प्रसुति गरेको र प्रोटकल अनुसार ३ पटक सुत्केरी जाँच गरेकोलगायतका सुचक पुरा गरेको पाइएपछि गाउँपालिकालाई पूर्ण संस्थागत सुत्केरी पालिका घोषणा गरिएको उहाँले बताउनुभयो ।

मातृ तथा नवजात शिशुको मृत्यु तथा जटिलता दर घटाउने, घरमा हुने असुरक्षित प्रसुति अन्त्य गरि संस्थागत प्रसुतिलाई प्रोत्साहन गर्न, मातृ तथा नवशिशु स्वास्थ्य सम्वन्धि राष्ट्रिय लक्ष्य,दिगो विकाश लक्ष्य र अन्तराष्ट्रिय प्रतिवद्धता पुरा गर्ने उद्धेश्यले ‘पूर्ण संस्थागत सुत्केरी पालिका’ घोषणा गरिएको गाउँपालिका अध्यक्ष कर्णसिंह साउँदले बताउनुभयो ।

सुरक्षित मातृत्व तथा नवजात शिशुको स्वास्थ्य संरक्षणलाई प्राथमिकता दिँदै स्वास्थ्य संस्थामा प्रसूति गराउने अभियान प्रभावकारी बनेकाले गाउँपालिकाले उक्त उपलब्धि हासिल गरेको उहाँले बताउनुभयो ।